بكلمك وخايفة عليكي .. لانك غالية
.
.
لانك غالية .. مينفعش تضيفي ولاد عندك وتقعدوا تتكلموا بالساعات , قال ايه بتتناقشوا في مواضيع عامة !!
...
حبكت يعني المواضيع العامة دي تناقشيها مع الولاد ؟!
ما البنات في كل حته ولا هي حجج وخلاص
ياحبيبتي ماتقوليش لا الموضوع عادي جدا واصلا ماما وبابا عارفين انا بعمل ايه
انتي من جواكي عارفة انه مش عادي
ليييييييه ؟ عشان بتغيري عليه
وانتي عارفة بقى سهوكة البنات وتأثيرها على الشباب
طيب واخوكي ده ذنبه ايه
كان قاعد في حاله كافي خيره شره وجيتي انتي دخلتي بروفايله لايك لايك لايك لحد ماخليتيه يودي ويجيب في دماغه ..
ياترى تعرفني ؟ ياترى عايزة مني ايه ؟ طيب اضيفها انا ولا استنى هي تضيفني ؟؟
ويمكن يكون الولد كان عايز يقوم يذاكر .. قام نفض للمذاكرة
ويمكن كمان يكون بيسمع محاضرة ولا حاجة مفيدة قام قفلها عشان يركز معاكي !!
بتحصل ولا مبتحصلش ؟؟
وتقومي بقى انتي بحسن نية تضيفيه وتدخلوا تتكلموا
اصل كل بوستاته دينية وحلوة وانا حاسه انها مفيدة وبتنفعني !
اصل كلامه بيشجعني على الخير !
اصل احنا اتفقنا نحفظ قرأن مع بعض !
اصل احنا زي الاخوات بالضبط وبنقول لبعض على مشاكلنا وبناخد رأي بعض !
لا ده مش زي اي حد .. هو اصلا دايما بيقولي انا بخاف عليكي زي اختي
ياراجل ! ولما انت بتخاف عليها بتكلمها ليه ؟
ولا انت اختك عادي تقعد بالساعات تكلم ولاد في نص الليل ؟؟
ده انتي بتتكلمي معاه اكتر ما بتتكلمي مع اخوكي الشقيق !
.
.
الكلام ده احنا بنقوله لنفسنا كل يوم
لكل لايك .. حجة
ولكل كومنت .. حجة
ولكل بوست .. حجة
ولكل اضافة .. حجة
بس لحد امتى ؟؟
لحد امتى واحنا مش حاسين ب ( الجريمة ) اللي بنعملها ؟
لحد امتى واحنا بنستهلك مشاعرنا في الكلام الفارغ ده ؟
لحد امتى واحنا كل يوم بنضيع معانا حد جديد ؟
لحد امتى واحنا بنضيع وقتنا اللي هنتسأل عليه يوم القيامة في كلام ضرره اكبر من نفعه ؟
لحد امتى يا غالية ؟؟
لحد امتى وانتي مش حاسه بالدور العظيم اللي مستنيكي ؟
لحد امتى هتفضلي تضيعي وقتك وانتي مش عارفة انك بتهدمي الامة باللي بتعمليه ده ؟
لانك غالية .. لازم توقفي لحظة
وخليكي صادقة مع نفسك
لحظة واحدة بس
تراجعي اللي بتعمليه في الفيس بوك وناس الفيس بوك
ياترى مستعدة يدخل معاكي القبر وتقابلي بيه ربنا ؟؟
لحظة الصدق مع النفس
ممكن تصلح امة